Hasil Sangkep Paum Krama dadia PGDT, Anggarkasih Tambir, 17 Juni 2025

Prajuru.com - Om Swastyastu, manut sekadi uleman utawi arahan saking jero kelian dadia, rahina mangkin sampun ngemargiang paruman, ngewilangin indik nyanggra piodalan Ageng ring Dadia PGDT desa adat Tamblang ring Rahina Anggarkasih Prangbakat 22 Juli 2025.

Pemilet utawi sane ngerauhin paruman ring rahina Anggara, 17 Juni 2025, prajuru/pengurus, pemangku pengemong, pengelingsir, ketua kelompok, lan krama dadia. Kelian dadia tan prasida ngerauhin krana ragane kari sungkan.

Paruman sampun memargi antar tur sampun medue keputusan sekadi ring sor puniki.

1. Pamilet sami sampun cumpu tur nyungkemin ngemargiang piodalan ageng, nanging piodalane sane jagi rauh, aturan piodalan ageng saking sinalih tunggil krama saking kelompok 3. Antuk punika krama dadia ten keni prabea (Peturunan).
2. Prabea sami sampun kesayagaang olih sane maturan piodalan akehnyane wantah Rp80.000.000 juta, krama dadia wantah ngewantu ngaryanin sarana prasana piodalan ageng.
3. Sang sane maturan piodalan, wantah maturan piodalan ageng manten, ten keruntutin antuk Pecaruan ageng ring sasih kenem (bulu geles)
4. Krama istri ten keni pepeson, sarana lan prasarana upakara sekadi busung, biu, jaje tur sane lianan, samian jagi numbas.
5. Indik paebatan, krama lanang sami sampun cumpu keni pepeson sekadi nyuh, saang, lakar jukut, don jati (yening kari wenten) lan sane istri keni pepeson nasi.
6. Paum istri jagi kemargiang malih 10 rahina ngawit mangkin.
7. Kelian dadia lan pengurus sane anyar jagi mererebu ring rahina piodalan ageng tatkala katur pedian.

Inggih wantah sapunike sane prasida titiang aturang ngeninin indik hasil paruman ring rahina anggara, 17 Juni 2025, antuk uratiane titiang ngaturang suksma, sineb titiang antuk parama santhi, Om Santhi, santhi, santhi om.

Lokasi:

Berbagi :